काठमाडौं । नेपालले आईसीसी विश्वकप क्रिकेट लिग–२ मा नेदरल्यान्ड्सविरुद्ध जित निकालेको छ । नेपालले बुधबार भएको खेलमा नेदरल्यान्ड्सविरुद्ध पाँच विकेटको जित निकालेको हो ।

स्कटल्यान्डको डुन्डीमा सम्पन्न खेलमा आरिफ शेखको अर्धशतकमा नेदरल्यान्ड्सले प्रस्तुत गरेको २२६ रनको लक्ष्य नेपालले ४७.१ ओभरमा पाँच विकेट गुमाएर पूरा गर्‍यो ।

नेपालको जितमा आरिफले ७८ रन बनाए । उनले सात चौका र दुई छक्का प्रहार गरे । त्यस्तै, दिपेन्द्रसिंह ऐरीले तीन चौकाको मदतमा ३८ रन बनाए ।

कुशल भुर्तेलले २५, आसिफ शेखले १९, भीम सार्कीले ११, कप्तान रोहित पौडेलले २३ र गुल्सन झाले ११ रन जोडे ।

नेदरल्यान्ड्सका लागि माइकल लेभिटले दुई तथा भिभियन किंग्मा र पल भान मेकरेनले समान एक विकेट लिए ।

यसअघि टस जितेर पहिले व्याटिङ गरेको नेदरल्यान्ड्सले ४९.१ ओभरमा सबै विकेट गुमाएर २२५ रनको योगफल खडा गरेको थियो ।

नेदरल्यान्ड्सका नोह क्रोएसले सर्वाधिक ४८ रन बनाए । उनले ५५ बलमा पाँच चौका प्रहार गरे । यस्तै, कप्तान स्कट एडवार्ड्सले ४६ रन थपे । विक्रमजित सिंहले ३८, च्याच लायनले २७, रोइलोफ भान डेर मेर्वेले २१ र तेजा निदामानुरुले १३ रन जोडे ।

नेपालका सोमपाल कामीले तीन विकेट लिए । करण केसी, सन्दीप लामिछाने र ललितनारायण राजवंशीले समान दुई विकेट लिए ।

जारी शृंखलामा नेपालको यो दोस्रो जित हो । यसअघि नेपालले पहिलो खेलमा घरेलु टिम स्कटल्यान्डविरुद्ध एक विकेटको रोमाञ्चक जित निकालेको थियो ।