काठमाडौं । नेपाल टेलिकमले बक्यौता रकममाथि लागेको जरिवाना छुट दिने भएको छ । बक्यौता रकम भुक्तानीका लागि छुटसहित अन्तिम मौका दिएको टेलिकमले तोकिएको अवधिभित्र रकम भुक्तानी नगरेमा कालोसूचीमा राख्ने तयारी गरेको छ ।

आर्थिक वर्ष ०७९/८० सम्म दूरसञ्चार सेवा उपभोग गरेर बक्यौता रकम नबुुझाएका कारण जरिवानामा परेका सेवाग्राहीलाई टेलिकमले सहुलियत प्रदान गर्न लागेको हो ।

आर्थिक वर्ष ०७९/८० सम्मको बक्यौता रकम आगामी मंसिर १ गतेदेखि ०८२ माघ मसान्तसम्म भुक्तानी गरेमा सोमा लाग्ने जरिवाना छुट गरिएको नेपाल टेलिकमले जनाएको छ ।

उक्त अवधिमा बक्यौता रकम भुक्तानी नगर्नेविरुद्ध भने टेलिकम कडा रूपले प्रस्तुत हुने भएको छ । टेलिकमका अनुसार उक्त अवधिभित्र बक्यौता रकम भुक्तानी नगर्ने ग्राहकको नाम पत्रिकामा र वेबसाइटमा प्रकाशन गर्नुका साथै कालोसूचीमा समावेश गर्ने प्रक्रिया पनि अघि बढाइनेछ ।