काठमाडौं । त्रिभुवन अन्तर्राष्ट्रिय विमानस्थलबाट ३९ किलो २८८ ग्राम थाई गाँजासहित आठ जना विदेशी नागरिक पक्राउ परेका छन् ।

लागू औषध नियन्त्रण ब्यूरोका अनुसार विदेशबाट हवाईमार्ग हुँदै नेपाल भित्राउने उच्चस्तरको गाँजाको तस्करीबारे प्रोफाइलिङ गर्ने क्रममा उनीहरूलाई पक्राउ गरिएको हो ।

भदौ १ गते राति बैंककबाट काठमाडौं आएको थाई एयरवेजको उडानबाट नेपाल आएका यात्रुहरूलाई शंका लागेर जाँच गर्दा उनीहरूको लगेजबाट ३९ किलो २८८ ग्राम थाई गाँजा बरामद भएको ब्यूरोले जनाएको छ ।

पक्राउ पर्नेमा म्यानमारका पाँच नागरिक र भारत पञ्जाबका तीन जना नागरिक छन् । पक्राउ परेकाहरूमाथि लागू औषधसम्बन्धी कसुरमा थप अनुसन्धान भइरहेको ब्यूरोले जनाएको छ ।