काठमाडौं – रास्वपा सांसद अमरेशकुमार सिंहले प्रधानमन्त्रीले बोलाउँदैमा अख्तियारका पदाधिकारी जान नहुने बताएका छन् । बिहीबार राज्य व्यवस्था सुशासन समितिको बैठकमा बोल्दै उनले अख्तियारका पदाधिकारीका कारणले अख्तियारले आफ्नो दायित्व पूरा गर्न नसकेको आरोप लगाए ।

‘संसदीय समितिमा आउन मिल्छ, अख्तियार प्रधानमन्त्री मातहतको संस्था होइन । त्यसैले अख्तियारका पदाधिकारीहरू कुनै मन्त्री वा प्रधानमन्त्रीले बोलाउँदैमा त्यहाँ धाउनु हुँदैन । अख्तियारको मर्यादा दिनप्रतिदिन समाप्त हुँदै गएको छ । यो प्रवृत्तिको अन्त्य हुनुपर्छ,’ उनले भने ।

सांसद सिंहले भागवन्डाको राजनीति अन्त्य गर्न प्रस्ताव गरेका छन् । ‘भागवन्डाको राजनीति अन्त्य गरौँ र पूर्व कर्मचारीहरूको क्लब बन्न नदिऔँ । जति संवैधानिक निकाय छन्, ती सबै पूर्व कर्मचारीहरूको क्लब वा आयोग बनेका छन्,’ उनले भने ।