काठमाडौं । नेपाल प्रहरीका महानिरीक्षक (आईजीपी) दानबहादुर कार्कीले देशभरका प्रहरी कार्यालय तथा विभिन्न युनिटका प्रमुखहरूलाई समसामयिक विषयमा आवश्यक निर्देशन दिएका छन् ।

आईजीपी कार्कीले बिहीबार भर्चुअल माध्यमबाट नेपाल प्रहरीका सबै ब्यूरो, प्रदेश प्रहरी कार्यालय, तालिम केन्द्र, जिल्ला प्रहरी कार्यालय तथा परिसर, ट्राफिक प्रहरी कार्यालय, विशेष सुरक्षा गण, विमानस्थल सुरक्षा कार्यालयलगायतका प्रमुखलाई सम्बोधन गर्दै निर्देशन दिएका हुन् ।

भर्चुअल बैठकमा राष्ट्रिय प्रहरी प्रशिक्षण प्रतिष्ठान महाराजगञ्ज, नेपाल प्रहरी अस्पताल, काठमाडौं उपत्यका प्रहरी कार्यालय रानीपोखरी, काठमाडौं उपत्यका अपराध अनुसन्धान कार्यालय टेकु, काठमाडौं उपत्यका ट्राफिक प्रहरी कार्यालय रामशाहपथ, नेपाल प्रहरी अपराध अनुसन्धान विद्यालय, नेपाल प्रहरी शिक्षालय भरतपुर तथा नेपाल प्रहरी युक्ति तालिम महाविद्यालय जर्गाहका प्रमुखहरू सहभागी थिए।

त्यस्तै, सबै प्रदेश प्रहरी गण, नेपाल प्रहरी राजमार्ग सुरक्षा तथा ट्राफिक व्यवस्थापन कार्यालय, विशेष सुरक्षा गण, प्रदेश प्रहरी तालिम केन्द्र, जिल्ला ट्राफिक प्रहरी कार्यालय, प्रहरी वृत्त तथा इलाका प्रहरी कार्यालयका प्रमुखहरूलाई समेत आईजीपी कार्कीले सम्बोधन गरेका थिए।

आईजीपी कार्कीले समसामयिक सुरक्षा अवस्था, प्रहरी कार्यसम्पादन तथा संगठनका विभिन्न विषयमा केन्द्रित रहेर कार्यालय प्रमुखहरूलाई निर्देशन दिएको नेपाल प्रहरीले जनाएको छ।