काठमाडौं। रसुवालगायत बाढीपहिरो प्रभावित क्षेत्रमा मानवीय क्षति निरन्तर बढ्दै गएको छ। राष्ट्रिय विपद् जोखिम न्यूनीकरण तथा व्यवस्थापन प्राधिकरणका अनुसार बुधबार बिहान ११ बजेसम्म बाढीपहिरोमा परी १ हजार ३६७ जनाको मृत्यु भएको पुष्टि भएको छ।

प्राधिकरणको विवरणअनुसार चितवनमा ३६३, नवलपरासी पूर्वमा २२६, नवलपरासी पश्चिममा २२२, नुवाकोटमा १९७, रसुवामा १७४, गोरखामा ७५, धादिङमा ७० र तनहुँमा ३८ जनाको शव फेला परेको छ।

उपचारका क्रममा काठमाडौँमा थप दुई जनाको मृत्यु भएको छ। फेला परेका शवमध्ये अहिलेसम्म १०२ जनाको मात्र पहिचान (सनाखत) भएको छ। पहिचान हुन नसकेका शव तथा मानव अङ्गहरूको व्यवस्थापनका लागि सम्बन्धित जिल्ला प्रहरी कार्यालयमा पुगेर डिएनए परीक्षणका लागि नमुना दिन सकिने व्यवस्था मिलाइएको छ।

यसैबिच, बाढीपहिरोपछि ५ हजार १३२ जना नागरिक अझै सम्पर्कविहीन रहेका छन्। रसुवाबाट मात्रै २ हजार ८६० जना बेपत्ता छन्; जसमा स्थानीय १ हजार ३९३, अन्य जिल्लाका १ हजार २८६, नेपाली सेनाका ४५, नेपाल प्रहरीका २५, सशस्त्र प्रहरीका १२, सरकारी कर्मचारी ७३ तथा बैंक तथा वित्तीय संस्थाका २६ जना कर्मचारी रहेका छन्।

यस्तै, नुवाकोटबाट १ हजार ७८७ जना र करिब ५८७ जना विदेशी पर्यटकसमेत सम्पर्कविहीन रहेका छन्। यद्यपि, यो तथ्याङ्कमा पहिचान हुन बाँकी शव र उद्धार गरिएका व्यक्तिहरूसमेत परेको हुनसक्ने भएकाले रुजु गर्ने काम भइरहेको प्राधिकरणले जनाएको छ।

विपद्का बिच हालसम्म १३ हजार ६४६ जनाको सकुशल उद्धार गरिएको छ। विभिन्न १० वटा अस्पतालमा ३२९ जनाको उपचार गरिएकामा २५२ जना निको भएर फर्किएका छन्। यसबाहेक नेपाली सेनाले ३ हजार ५३५ र सशस्त्र प्रहरीले ३ हजार २८७ जनालाई प्रत्यक्ष उपचार सेवा प्रदान गरेका छन्।

उद्धार तथा राहत कार्यका लागि तीनवटै सुरक्षा निकायका गरी कुल २१ हजार १८५ जना सुरक्षाकर्मी मैदानमा खटिएका छन्, जसमा नेपाली सेनाका ९ हजार ७, नेपाल प्रहरीका ७ हजार ९७५ र सशस्त्र प्रहरीका ४ हजार २०३ जना रहेका छन्।

हवाई उद्धारलाई पनि तीव्रता दिइएको छ; नेपाली सेनाले भदौ २३ सम्म १ हजार २६४ उडान र भदौ २४ मा थप २१ उडान गरेको छ भने सशस्त्र प्रहरी बलले २५८ पटक हवाई उडान भरेको छ।

प्रभावित क्षेत्रका ३७ वटा होल्डिङ सेन्टरमा ३ हजार ६२८ जनालाई राखिएको छ, जसमध्ये रसुवामा ७३३, नुवाकोटमा २ हजार ६९९ र धादिङमा १९६ जना रहेका छन्।

सरकारले राहत स्वरूप रसुवा र नुवाकोटलाई एक-एक करोड, धादिङलाई ५० लाख र प्रभावित १५ पालिकालाई १३ करोड ५० लाख रुपैयाँ नगद निकासा गरिसकेको छ।

प्रभावित क्षेत्रमा ४९ हजार लिटर डिजेल, २२ हजार लिटर पेट्रोल, १५ हजार लिटर हवाई इन्धन मौज्दात राखिनुका साथै ४५७ वटा ग्यास सिलिन्डर अनुदानमा पठाइएको छ। सडक तथा हवाईमार्गबाट खाद्यान्न र अन्य राहत सामग्री पठाउने काम निरन्तर जारी छ, जसमा विभिन्न निकाय, निजी क्षेत्र र नागरिक समाजको ठुलो सहयोग रहेको छ।

साथै, विपद्बाट प्रभावित नागरिकको मानसिक स्वास्थ्यलाई ध्यानमा राख्दै स्वास्थ्य मन्त्रालयमार्फत १५० भन्दा बढी मनोसामाजिक परामर्शदाता जनशक्तिसमेत परिचालन गरिएको छ।