काभ्रे।दसैं, तिहार र छठलगायत चाडपर्वलाई लक्षित गर्दै साल्ट ट्रेडिङ कर्पोरेशन लिमिटेडले काभ्रेको बनेपा र धुलिखेलमा सुपथ मूल्य पसल सञ्चालनमा ल्याएको छ।

चाडपर्वका बेला बजारमा हुनसक्ने सम्भावित मूल्यवृद्धि हस्तक्षेप गर्दै उपभोक्तालाई सुलभ दरमा दैनिक उपभोग्य वस्तु उपलब्ध गराउने उद्देश्यले सञ्चालनमा ल्याइएको सुपथ मूल्य पसलमा चाडपर्वका सामग्री खरिद गर्ने उपभोक्ताको चाप बढेको छ।

बनेपाको तीनदोबाटोस्थित कर्पोरेशनको वितरण केन्द्रमा सञ्चालित सुपथ मूल्य पसल छठ पर्वसम्म सञ्चालन हुनेछ। शनिबारसहित हप्ताको सातै दिन बिहान ९ः०० बजेदेखि बेलुका ६ः०० बजेसम्म पसल खुला रहनेछ।

साल्ट ट्रेडिङ कर्पोरेशन बनेपा शाखाका कार्यालय प्रमुख सुरेन्द्र अवालेका अनुसार विशेष मूल्यसूची निर्धारण गरिएको छ। पसलमा नुनको मूल्य २४ रुपैंयाँ प्रतिकेजी र चिनीको मूल्य १०० रुपैंयाँ प्रतिकेजी तोकिएको छ।

त्यस्तै, २५ किलोग्रामको भान्साघर स्टिम जिरा मसिनो चामलको मूल्य दुई हजार ५८० रुपैंयाँ कायम गरिएको छ। मङ्गलम, पाल्की, निश्चल, नातिनातिनी र बहुलीलगायत विभिन्न ब्रान्डका चामल समेत छुटसहित बिक्रीका लागि राखिएका छन्।

मूल्य सूचीअनुसार मुसुरो दाल प्रतिकिलोग्राम १४० रुपैयाँ, रहर दाल २१० रुपैंयाँ, मास दाल २०५ रुपैंयाँ र चना दाल १५५ रुपैंयाँ प्रतिकिलोमा बिक्री भइरहेको छ। मुग दाल, विभिन्न प्रकारका सिमी तथा गेडागुडी समेत छुट मूल्यमा उपलब्ध रहेको उनले बताए।

मनश्री र सिवालिक ब्रान्डका आटा तथा मैदा, कोदो र फापरको पिठो तथा मकै र जौको च्याख्लासमेत बिक्रीका लागि राखिएको छ। घ्यु तथा तेलतर्फ डिडीसी घ्यु एक हजार १४० रुपैंयाँ, शान्ति तोरीको तेल ३८० रुपैंयाँ र तृप्ति तोरीको तेल २७० रुपैंयाँमा उपलब्ध छन्। सनबिम सूर्यमुखी तेल समेत बिक्रीका लागि राखिएको छ।

त्यस्तै, अर्गानिक लसुन, अदुवा, दालचिनी, खुर्सानी, बेसारलगायत मसला तथा विभिन्न ब्रान्डका चिया समेत उपलब्ध छन्। खाद्यान्न बाहेक अन्य घरायसी सामग्रीमा सहुलियत दिइएको कर्पोरेशनले जनाएको छ।

एसटिसी ग्यास सिलिन्डर दुई हजार १६५ रुपैंयाँ, लुनारको दुई हजार वाटको इन्डक्सन कुकटप चार हजार ९६० रुपैंयाँ र किनमेल गर्ने झोला ३५ रुपैंयाँमा उपलब्ध रहेको कार्यालय प्रमुख अवालेले बताए। चाडपर्वका बेला आवश्यक उपभोग्य वस्तु सुलभ र सहज रूपमा खरिद गर्न उनले उपभोक्तालाई आग्रह गरे।

खुला बजारका तुलनामा सुपथ मूल्य पसलमा सस्तो दरमा खाद्यान्न तथा घरायसी सामान पाएपछि उपभोक्ताले राहत महसुस गरेका छन्। पसलमा सामान खरिद गरिरहेकी बनेपाकी स्थानीय उपभोक्ता रमिता नेपालीले बजारमा महँगी बढेकाबेला साल्ट ट्रेडिङले चाडपर्वको मुखमा सस्तोमा नुन, तेल, चामल र दाल उपलब्ध गराउँदा आफूहरू जस्ता सर्वसाधारणलाई ठूलो राहत भएको बताइन्। उनले भनिन्, “यसले घरखर्च चलाउन सहज भएको छ।”

साल्ट ट्रेडिङले यही असोज १ गतेदेखि दसैं, तिहार तथा छठपर्वलाई लक्षित गरी सुपथ मूल्य पसल सञ्चालनमा ल्याएको हो। साल्ट ट्रेडिङ कर्पोरेशन लिमिटेडले विर्तामोड, विराटनगर, राजविराज, लहान, जनकपुर, वीरगञ्ज, हेटौंडा, नारायणगढ, त्रिशूली, पोखरा र बागलुङमा दसैं, तिहार र छठ पर्वलाई लक्षित गर्दै सुपथ मूल्य पसल सञ्चालन गरेको छ।