काठमाडौं । एकीकृत समाजवादीका प्रवक्ता जगन्नाथ खतिवडाले प्रधानमन्त्री पुष्पकमल दाहाललाई भेटेका छन् ।

शुक्रबार बिहान प्रधानमन्त्रीनिवास बालुवाटार पुगेर खतिवडाले प्रचण्डसँग भेटवार्ता गरेका हुन् ।

दुईबीच झण्डै आधा घण्टा छलफल भए पनि यसबारे विस्तृत केही बताइएको छैन । सरकारमा सहभागिता, प्रधानमन्त्रीले संसदमा लिन लागेको विश्वासको मतबारे छलफल भएको अनुमान गरिएको छ ।

प्रधानमन्त्री प्रचण्डले एकीकृत समाजवादी पनि आफू नेतृत्वको सरकारमा सामेल होस् भन्ने चाहेका छन् । तर आफूहरूसँग छलफल नगरी गठबन्धन तोडेर एमालेलगायत दलसँगको समर्थनमा प्रधानमन्त्री बन्न गएको भन्दै समाजवादीले प्रचण्डसँग चित्त दुखाएका छन् ।

समाजवादीबाट प्रचण्डले साथ खोजे पनि उसले सरकारमा समर्थन हुने मनस्थिति बनाएको छैन । भर्खरै सम्पन्न समाजवादीको बैठकले पनि सरकारमा सहभागी नहुने निष्कर्ष निकालेको छ ।