काठमाडौं । भारतमा निर्माण गरिएको विश्वकै सबैभन्दा लामो क्रुज आजदेखि सञ्चालनमा आउने भएको छ । भारतीय प्रधानमन्त्री नरेन्द्र मोदीले क्रुजलाई भर्चुअल माध्यमबाट लन्च गर्दैछन् ।

गंगा विलास नाम दिइएको क्रुजले स्विटजरल्याण्डका ३२ यात्रु बोकेर पहिलो यात्रा गर्नेछ । क्रुज वाराणसीको रविदास घाटबाट प्रस्थान गरी बंगलादेश, बिहार, बंगाल हुँदै असमको डिब्रुगढ पुग्नेछ। यसले कुल ५१ दिन यात्रा गर्नेछ ।

यो यात्रुवाहक जहाजले भारत र बंगलादेशका २७ नदी प्रणाली र गंगा, भागीरथी, मेघना, हुग्ली, जमुना, पद्मा र ब्रह्मपुत्र गरी सात नदीहरू पार गर्नेछ। यो यात्रामा ५० पर्यटकीयस्थल जोडिनेछ ।

यो विशेष जहाज कोलकाता नजिकैको शिपयार्डमा निर्माण गरिएको हो । गंगाविलास क्रुज सुरु भएपछि देशको रिभर क्रुज पर्यटनमा ठूलो टेवा पुग्ने विश्वास गरिएको छ ।