काठमाडौं (एजेन्सी) । युक्रेनका राष्ट्रपति भोलोदिमिर जेलेन्स्कीले ओलम्पिक खेलकुदमा रुसलाई भाग लिन अनुमति दिन नहुने बताएका छन् । वस्तुस्थितिको सही विवेचनाविपरीत त्यसो गरिएमा त्यसले आतंकवादलाई ‘अनुमोदन’ गरेको सन्देश दिने उनको भनाइ छ ।

सन् २०२४ मा पेरिसमा आलेम्पिक खेलकुद हुँदैछ । जसमा देशको प्रतिनिधित्व नगरी  रुस र बेलारुसका खेलाडीलाई प्रतिस्पर्धा गर्न दिने निर्णय अन्तर्राष्ट्रिय ओलम्पिक कमिटी (आईओसी) ले गरेको छ ।  जसको अर्थ खेलाडीले आफ्नो देशको प्रतिनिधित्व नगरी तटस्थ रूपमा मात्रै भाग लिनेछन् । तर युक्रेनले फ्रान्सका राष्ट्रपति इमानुएल म्याक्रोनसँग यसबारे पुनर्विचार गर्न आग्रह गरेको छ ।

‘ओलम्पिकजस्तो प्लेटफर्म रुसलाई प्रचारप्रसारका लागि प्रयोग गर्न दिनु हुँदैन,’ जेलेन्स्कीले भने ।

तर युक्रेनले सन् २०२४ मा हुने पेरिस ओलम्पिकमा रुस र बेलारुसका खेलाडी सहभागी भए उक्त कार्यक्रम बहिष्कार गर्ने चेतावनी दिएको छ ।

‘रूसी खेलाडीहरूलाई ओलम्पिकमा भाग लिन अनुमति दिनु भनेको सम्पूर्ण विश्वलाई आतंक स्वीकार्य छ भन्नु हो,’ जेलेन्स्कीले एक भिडियो सन्देशमा भनेका छन् ।

रसियालाई यो खेल वा अन्य कुनै पनि खेलकुद कार्यक्रममार्फत प्रचार वा उसको राष्ट्रवादलाई बढावा हुने अवसर दिन नहुने जेलेन्स्कीको तर्क छ ।

बेलायतले पनि रुसी खेलाडीलाई तटस्थतामा ओलम्पिकमा सहभागी हुन दिने योजनाको निन्दा गरेको छ ।