काठमाडौं । आइसीसी महिला टी–२० विश्वकप आजदेखि देखि सुरु हुँदैछ। दक्षिण अफ्रिकाको आयोजनामा आइसिसी महिला टी–२० विश्वकपको आठौं संस्करण हुन लागेको हो ।

प्रतियोगिताअन्तर्गत पहिलो खेल दक्षिण अफ्रिका र श्रीलंकाबीच केप टाउनमा हुँदैछ । दोस्रो खेल वेस्ट इन्डिज र इंग्ल्याण्डबीच हुने तय छ ।

फेब्रुअरी ११ मा अष्ट्रेलिया र न्युजिल्यान्डको टिम भिड्दैछन् भने भारत–पाकिस्तान महिला टोलीबीचको खेल फेब्रुअरी १२ मा केप टाउनमा खेलिनेछ। सोही दिन केप टाउनमा बंगलादेश र श्रीलंकाबीचको अर्को खेल पनि हुनेछ ।

प्रतियोगिताको पहिलो सेमिफाइनल २३ र दोस्रो २४ फेब्रुअरीमा हुनेछ । प्रतियोगिताको फाइनल २६ फेब्रुअरीमा केप टाउनमा खेलिनेछ ।

महिला टी–२० क्रिकेट विश्वकपको पहिलो संस्करण इङ्ल्याण्डमा सन् २००९ मा सम्पन्न भएको थियो । सन् २०१२ सम्म यसमा आठ टोली सहभागी रहेकोमा सन् २०१४ मा बढेर १० पुगेको थियो ।

महिला टी–२० विश्वकपका सात संस्करण सन् २००९, २०१०, २०१२, २०१४, २०१६, २०१८ र २०२० मा सम्पन्न भएका थिए ।

कोरोना महामारीका कारण सन् २०२२ मा भने आयोजना हुन सकेन ।

यस्तो हुनेछ ढाँचा ?

महिला टी–२० विश्वकपका १० टोलीलाई दुई समूहमा विभाजन गरिएको छ । समूह–१ मा अष्ट्रेलिया, न्युजिल्यान्ड, दक्षिण अफ्रिका, श्रीलंका र बंगलादेशका टोली परेका छन् ।

भारत समूह–२ मा छ, जहाँ इंग्ल्याण्ड, वेस्ट इन्डिज, पाकिस्तान र आयरल्याण्ड छन् । टिम वरीयतामा अस्ट्रेलिया पहिलो स्थानमा छ भने इंग्ल्याण्ड दोस्रोमा । न्युजिल्याण्डको महिला टोली तेस्रो र भारतीय टोली चौथो स्थानमा छ ।

दक्षिण अफ्रिका पाँचौं, वेस्ट इन्डिज छैटौं र पाकिस्तान सातौं स्थानमा छ । श्रीलंका आठौं, बंगलादेश नवौं र आयरल्यान्ड दशौं स्थानमा छ ।