काठमाडौं । नेकपा एमालेको भातृ संगठन अखिल नेपाल स्वतन्त्र विद्यार्थी युनियनको २३ औं महाधिवेशन सुरु भएको छ । एमाले अध्यक्ष केपी शर्मा ओलीले ड्रोन उडाएर उद्घाटन गरेको महाधिवेशनले आगामी कार्यकालका लागि नयाँ नेतृत्व चयन गर्नेछ ।

अनेरास्ववियुको अध्यक्षका लागि ४ विद्यार्थी नेताले दाबेदारी प्रस्तुत गरेका छन् ।

अध्यक्षमा आरसी लामिछाने, समिक बडाल, लोकेश निरौला र मोती विकले आकांक्षा देखाएका छन् । विद्यार्थी राजनीतिमा लामो समयदेखि सक्रिय लामिछाने वरिष्ठ उपाध्यक्ष हुन् । निरौला र विक उपाध्यक्ष हुन् भने बडाल महासचिव ।

नेतृत्वमा चार जनाले दाबी पेश गरे पनि मुख्य प्रतिस्पर्धा लामिछाने र बडालबीच हुने देखिएको छ ।

उपाध्यक्षमा टपेन्द्र शाही, जेनिशा लामा, मर्यादा विष्ट, एलबी सिंह, डम्बर अधिकारी, रामशरण चौधरीले दाबी गरेका छन् ।

महासचिवमा आधा दर्जनको दाबी छ । नारायण घर्ती, नरेश रोकाया, सुदर्शन सिवाकोटी, धर्म गिरी, गोविन्द गिरी र भाष्कर खनाल महासचिवको दाबेदार हुन् ।

आफ्नो पल्ला भारी पार्न पदाधिकारीका दाबेदारले लबिङ तीव्र पारेका छन् ।

तीन दिनसम्म चल्ने महाधिवेशनले ३ महिला, १ समावेशी र ६ खुला सचिव गरी १० सचिव छनोट गर्नेछन् । महाधिवेशनले ४९ सदस्यीय स्थायी कमिटी पनि गठन गर्नेछ ।