काठमाडौं । नायक अनमोल केसी अभिनित चलचित्र ‘छड्के २’ रिलिज भएको एक साता पनि नपुग्दै हलबाट बाहिरिएको छ । दर्शकको साथ नपाएपछि यो चलचित्रलाई क्यूएफएक्स चेनले सबै हलबाट उतारेको हो । अन्य हलहरूले पनि उसैगरी प्रदर्शन बन्द गरेका छन् ।

छड्के २ र छक्कापञ्जा ४ गत शुक्रबार एकसाथ रिजिल भएका थिए । छक्कापञ्जाले राम्रो व्यापार गरिरहँदा छड्के २ प्रति भने दर्शकको आकर्षण हुन सकेन । छड्के २ बारे आएको लगातारको खराब समीक्षाले पनि दर्शकलाई विकर्षित गरिएको ठानिएको छ ।

अनमोल अभिनित फिल्म असफल नै हुँदैन भन्ने मानक पछिल्लो समय विकास भएर गएको थियो । हुन पनि उनका अघिल्ला कुनै पनि फिल्म असफल बनेका थिएनन् । यो असफलताको अपजसको सबैभन्दा ठूलो भारी निर्देशक निगम श्रेष्ठलाई बोकाइएको छ । फिल्म डुबाउनुको साथै अनमोलको भर्भराउँदो करिअरमा समेत संकट उत्पन्न गराएको आरोप उनीमाथि छ ।