काठमाडौं । इंग्लिस क्लब म्यानचेस्टर सिटीले च्याम्पियन्स लिग फुटबलको क्वाटरफाइनलको पहिलो लेगमा सुविधाजनक जित निकालेको छ ।

गएराति सम्पन्न खेलमा सिटीले बायर्न म्युनिखलाई ३–० गोलान्तरमा पराजित गरेको हो ।

सिटीको जितमा रोड्री, बेर्नार्डो सिल्भा र अर्लिङ हालाण्डले समान एक/एक गोल गरे । उनीहरूले क्रमशः २७ औं, ७० औं र ७६ औं मिनेटमा गोल गरेका हुन् ।

योसँगै हालाण्ड एकै सिजनका सबै प्रतियोगितामा गोल गर्ने पहिलो प्रिमियर लिगका खेलाडी बनेका छन् । यस सिजनमा ३९ खेल भएकोमा उनले ४५ गोल गरेका छन् ।

बार्यन म्युनिखलाई हराएसँगै सिटी च्याम्पियन्स लिगको सेमिफाइनलनजिक पुगेको छ । बार्यनको पनि अर्को चरणमा पुग्ने सम्भावना जीवित छ । तर उसले दोस्रो लेगमा फराकिलो जित निकाल्नुपर्ने खाँचो छ ।