काठमाडौं । इण्डियन प्रिमियर लिग (आइपिएल) को २० औं खेलमा रोयल च्यालेन्जर्स बैंगलोरले दिल्ली क्यापिटल्सलाई २३ रनले पराजित गरेको छ ।

शनिबार सम्पन्न खेलमा बैंगलोरले यो सिजनमा दोस्रो जित हात पारेको हो ।

पहिले ब्याटिङ गरेको रोयल च्यालेन्जर्स बैंगलोरले विराट कोहलीको अर्धशतकको मद्दतले ६ विकेट गुमाएर १७४ रन बनायो । कप्तान फाफ डुप्लेसीले २२, महिपाल लोमररले २६, ग्लेन म्याक्सवेलले २४ र शाहबाज अहमदले २० रनको योगदान दिए ।

जवाफमा दिल्ली क्यापिटल्सको टोलीले निकै खराब सुरुवात गर्यो ।

कप्तान वार्नरले १९ रन बनाए भने पृथ्वी श र मिचेल मार्सले खाता खोल्न सकेनन् ।

यश धुलले मात्र १ रन बनाए । मनिष पाण्डेले अर्धशतकीय पारी खेले ।

दिल्लीको टोलीले अन्ततः २० ओभरमा ९ विकेट गुमाएर १५१ रन मात्र बनाउन सक्यो ।

आईपीएलको यो सिजनमा दिल्ली क्यापिटल्सको यो लगातार पाँचौ हार हो । अंक तालिकामा यो टिम १० औं अर्थात अन्तिम स्थानमा छ ।

रोयल च्यालेन्जर्स बैंगलोरको यो जितसँगै अंक तालिकामा एक स्थान सुधार गर्दै सातौं स्थानमा उक्लिएको छ ।