काठमाडौं । चितवन क्षेत्र नम्बर २ मा राष्ट्रिय स्वतन्त्र पार्टीका उम्मेदवार रवि लामिछाने झन् शक्तिशाली भएर उदाएका छन् । प्रतिनिधिसभा सदस्यका लागि उनले गत मंसिरमा र अहिले पाएको जनमतले यस्तो देखाएको हो ।

यसपटकको निर्वाचनमा रविले प्राप्त मत र मतान्तर दुवैमा आफ्नै रेकर्ड ब्रेक गरेका छन् । आफ्ना निकटतम प्रतिद्वन्द्वी नेपाली कांग्रेसका उम्मेदवार जितनारायण श्रेष्ठकोबीचमा उनको मतान्तर नै ४३०६१ रहेको छ । यसअिघको चुनावमा उनले नेपाली कांग्रेसका उम्मेदवार उमेश श्रेष्ठ भन्दा ३४२८१ बढी मत पाएका थिए ।

यसपटकको मतान्तर रविले झण्डै यसअघिको चुनावमा पाएको मतको संख्या बराबर हो । उनले अघिल्लो चुनावमा ४९ हजार ३०० मत प्राप्त गरेका थिए । यसपटक उनको कुल मत ५४१७५ रहेको छ ।

नागरिकता विवादमा संसदबाट पदच्युत भएका रवि उपनिर्वाचनबाट पुनः सांसद निर्वाचित भएका छन् ।