काठमाडाैं । सरकारले झण्डै तीन अर्ब रुपैयाँ अनुदान रकम भुक्तानी नगरेपछि नीर्जीवन बीमा कम्पनीहरूले जेठ ७ (आज) देखि कृषि बीमा बन्द गर्ने भएका छन् ।

यसभन्दा अघि (बैशाख ३१) मा निर्जीवन बीमा कम्पनीहरूको संस्था नेपाल बीमक संघले प्रेस विज्ञप्ती जारी गर्दै जेठ ७ गतेदेखि कृषि बीमालेख जारी गर्ने र बीमालेखअन्तर्गतको दाबी भुक्तानी दिने कार्य बन्द गरिने घोपणा गरेका थिए ।

तर सरकारले भुक्तानीसम्बन्धी कुनै वास्ता नगरेको कारणले बाध्यतावस कृषि बीमा बन्द गर्नु परेको संघले जनाएको छ ।

संघका अनुसार सरकारले २०७७ देखि बीमा कम्पनीहरूलाई कृषि बीमाबापतको रकम भुक्तानी गर्न बाँकी छ । २०७८ देखि बाली बीमा र पशुपन्छी बीमाको अनुदान रकम भुक्तानी नगरेको संघले जनाएको छ ।

बाली तथा पशुपालन व्यावसायमा भएका जोखिम तथा अनिश्चितता कम गरी कृषकहरुलाई कृषि व्यवसायतर्फ उन्मुख गर्न र कृषि क्षेत्रमा निजी, सरकारी तथा वित्तीय संस्थाहरुको लगानी बढाउन र लगानी सुरक्षित गर्न भन्दै सरकारले कृषि बीमा कार्यक्रम सुरू गरेको थियो । सरकारले कृषि मन्त्रालयको नेतृत्वमा ०६९ माघ १ गतेदेखि औपाचारिक रूपमा कृषि बीमा कार्यक्रम सुरू गरेको हो ।