काठमाडौं । राष्ट्रिय स्वतन्त्र पार्टीका सांसद डोलप्रसाद अर्यालले सरकारको वार्षिक नीति तथा कार्यक्रममा समेत सांसदरूको न्यून उपस्थितिलाई लिएर आलोचना गरेका छन् ।

सोमबार छलफलमा भाग लिँदै सदनमा सांसदहरूको उपस्थिति देख्दा आफूलाई रोस्टममा उभिए बोल्नसमेत लाज लागेको उनले बताए ।

‘सम्मानीय सभामुख महोदय संसदमा सांसदहरूको उपस्थिति देख्दा रोस्टममा उभिए बोल्नसमेत मलाई लाज लागेको छ । २७५ सांसद रहेको सदनमा बोल्दा ऐना अगाडि उभिएर भाषण गरेजस्तै लागेको छ’, उनले भने, ‘संसद बैठक रेकर्डका लागि मात्र बसेको जस्तो लाग्छ । घरमै बसेर पेनड्राइभमा रेकर्ड गराएर पठाए पनि हुनेजस्तो देखिएको छ । यस्तो अवस्था चाँडै अन्त्य होस् ।’

सांसदहरूको न्यून उपस्थितिलाई लिएर रास्वपाले यसअघि पनि पटक पटक सभामुखको ध्यानकर्षण गराएको थियो । सरकाले जेठ ५ बजे प्रस्तुत गरेको नीति तथा कार्यक्रममाथि सांसदहरूले आ–आफ्ना सुझाव दिइरहेका छन् ।