काठमाडौं । प्रधानमन्त्री पुष्पकमल दाहाल ‘प्रचण्ड’ ले नागरिकता विधेयकमा पूर्वराष्ट्रपति विद्यादेवी भण्डारीले संविधानको उल्लघंन गरेको आरोप लगाएका छन् ।

सोमबार सांसदहरूले उठाएको प्रश्नको जवाफ दिनेक्रममा उनले विधेयक प्रमाणीकरण प्रक्रियामा वर्तमान सरकारले संविधान नमिचेको जिकिर गरे ।

‘नागरिकता प्रमाणीकरण प्रक्रियाबारे संसदले दुइपटक पारित गरेर राष्ट्रपतिकोमा पठाएकोमा अघिल्लो राष्ट्रपतिले होल्ड गरेर राखेका हुन् । राष्ट्रपतिले त्यतिबेला संविधान उल्लङ्गन गरेका हुन् । संवैधानिक हैसियतमा रहेका तत्कालीन राष्ट्रपतिबाट संविधान मिचिएको हो’, उनले भने, ‘एउटा सरकारले गरेको निर्णय अर्को सरकारले मान्दिन भन्न पाउँदै अभिछिन्न अधिकार प्राप्त गरेको सरकारले मान्नुपर्छ । त्यस्तै एउटा संसदले पारित गरेको विषय अर्को अभिछिन्न संसदले विधेयक फिर्ता लिने भन्ने मल्दिैन । दुइपटक संसदले पारित गरेको निर्णय राष्ट्रपतिले थन्क्याएर राख्न मिल्दैन ।’

प्रधानमन्त्रीले बोल्ने क्रममा विपक्षी सांसदहरूले आपत्ति जनाएपछि संसदमा सत्तापक्ष र विपक्षले होहल्ला गरेका छन् । नियमापत्तिका विषयमा समाभुख घिमिरेले विपक्षका सांसदहरूलाई बोल्न दिएका छन् ।