काठमाडौं । राष्ट्रिय प्रजातन्त्र पार्टी (राप्रपा)का प्रवक्ता ज्ञानेन्द्र शाहीले दुनियाँमा असफल भइसकेको कम्युनिस्टहरूको माक्र्सवाद र लेनिनवाद सिद्धान्त नेपाललाई नचाहिएको बताएका छन् ।

नेपाल एकिकरणको सुरुवात भएको स्थान गोरखाको भूमिबाट ‘राष्ट्रनिर्माता’ पथ्वीनारायण शाहलाई सम्झिँदै उनले नेपालले मौलिक सिद्धान्त आत्मसात गर्नुपर्ने बताए ।

‘हामीलाई दुनियाँमा फेल भइसकेको कुनै विदेशी दलालको माक्र्सबाद र लेनिनबाद चाहिएको होइन’ल उनले भने, ‘हामीलाई त पृथ्वीनारायण शाहको पथमा अधिन रहने नेपाल सुहाउने ब्यवस्था नेपालवाद चाहिएको हो ।’

प्रवक्ता शाहीले पृथ्वीनारायणले एकीकरण नगरेको भए अहिले नेपाल भारत वा चीनको गुलामी भएको हुने दाबीसमेत गरे ।

‘यो मुलुकको निर्माण कसैले गरेको हो भने त्यो एक मात्र व्यक्ति पृथ्वीनारायण हो । जसका कारणले आज हामी शानसँग नेपाली हुँ भनेर हिँड्न पाएका छौं’, उनले थपे, ‘यदि उहाँले यो मुलुकको एकीकरण नगर्दिनुभएको भए हामी भारत र चीनका गुलाम भइसक्ने थियौँ ।’

अध्यक्ष राजेन्द्र लिङ्देनलगायतका पाधिकारीसहित पनि गोरखा पुगेका थिए ।