काठमाडौं । प्रधानमन्त्री प्रचण्डको अभिव्यक्तिलाई लिएर प्रमुख प्रतिपक्षी दल नेकपा एमालेले प्रतिनिधिसभा बैठकमा राजीनामा मागेको छ । निर्धारित समयभन्दा आधा घण्टा ढिलो गरी बसेको बैठक सुरू हुनादा एमाले र रास्वपाका सांसदहरूले उठेर विरोध जनाएका थिए । बैठकमा बोल्दै एमालेका सांसद रघुजी पन्तले प्रधानमन्त्रीको राजीनामा नआएसम्म संसद चल्न नदिने चेतावनी दिए ।

‘सभामुख महोदय प्रधानमन्त्रीको अभिव्यक्तिले नेपालीको स्वाभिमानमा ठेस लागेको छ । उहाँको अभिव्यक्ति लेण्डुप प्रवृत्तिको नेपाली संस्करण हो । भारतले बनाएको प्रधानमन्त्रीलाई पदमा बस्ने कुनै अधिकार छैन । उहाँले पदबाट राजीनामा नदिएसम्म योे सदन चल्न दिने छैनौं’, उनले भने ।

विपक्षी दलको निरन्तर अवरोधपछि सभामुख देवराज घिमिरेले आदा घण्टाको लागि बैठक स्थगित गरेका छन् । यसअघि बसेको राष्ट्रिय सभाको बैठक पनि एमालेको अवरोध भएपछि स्थगित भएको थियो ।