काठमाडौं । राष्ट्रिय सभा सदस्य वामदेव गौतमले सुन तस्करी प्रकरणमा उच्च स्तरीय छानविन समिति गठन गर्न आवश्यक नरहेको बताए छन् ।

राष्ट्रिय सभाको आजको बैठकमा बोल्दै पुर्वगृहमन्त्री समेत रहेका गौतमले यहि अवस्थामा समिति गठन गरे छानबिन ओझेलमा पर्ने बताएका हुन् ।

एमालेको माग अनुसार उच्चस्तरीय छानबिन समिति गठन गर्दा प्रधानमन्त्री, अर्थमन्त्री र गृहमन्त्रीमाथि पनि छानबिन हुन सक्ने र त्यसका लागि उनीहरुले राजीनामा गर्ने अवस्था आउने बताएका हुन् ।

यस्तो अवस्थामा नयाँ सरकार गठनमा लाग्दा त्यसले अहिले भइरहेको अनुसन्धान पनि ओझेलमा पर्ने बताए ।

सरकार परिवर्तन गर्नुपर्ने भए अविश्वासको प्रस्ताव ल्याउन पनि गौतमले एमालेलाई सुझाव दिएका छन् । ’प्रधानमन्त्रीलाई हटाउने हो भने अविश्वासको प्रस्ताव लगे भइहाल्यो,’ उनले भने ।

गृहमन्त्री नारायणकाजी श्रेष्ठले सीआईबीलाई छानबिनका लागि ३५ दिनको समय रहेको कुरा उल्लेख गर्दै गौतमले त्यसपछि उच्चस्तरीय छानबिन समिति मागेर जानुपर्ने बताए ।