काठमाडौं । नेकपा माओवादी केन्द्रले संघीय मामिला तथा सामान्य प्रशासन मन्त्री अमनलाल मोदीलाई सरकारबाट फिर्ता बोलाउने निर्णय गरेको छ ।

आज प्रधानमन्त्री निवास बालुवाटारमा बसेको पार्टीको पदाधिकारी बैठकले यस्तो निर्णय गरेको सचिव देवेन्द्र पौडेलले बताए ।

सरकारबाट फिर्ता बोलाउने भनिएका संस्कृति, पर्यटन तथा नागरिक उड्डयन मन्त्री सुदन किराँती भने जोगिएका छन् । उनी र मोदीमध्ये एकजनालाई फिर्ता बोलाउने चर्चा थियो ।

मोदीको ठाउँमा जनमत पार्टीकी अनिता देवी साहलाई उक्त जिम्मेवारी दिने निर्णय भएको छ ।

गत ३ माघमा मन्त्री बनेका मोदी मोरङ क्षेत्र नम्बर ५ बाट निर्वाचित सांसद हुन् ।

पौडेलका अनुसार प्रधानमन्त्री पुष्पकमल दाहाल प्रचण्ड काठमाडौं आउन नसकेका कारण आज शपथ ग्रहण नहुने भएको छ । चितवन पुगेका उनी मौसम प्रतिकूलताका कारण उडान प्रभावित भएपछि उतै रोकिएका छन् ।