काठमाडौं । कोशी प्रदेश सरकार गठनको विवादमाथि आज सुनुवाइ हुँदैछ ।

कोशीमा उद्धव थापालाई मुख्यमन्त्रीमा प्राप्त विश्वासको मतलाई संविधानसम्मत मान्न नमिल्ने भन्दै नीतिगत निर्णय नगर्न कोशी सरकारका नाममा ७ भदौमा सर्वोच्चका न्यायाधीश ईश्वरप्रसाद खतिवडाको एकल इजलासले अन्तरिम आदेश जारी गरेको थियो ।

थापाले प्राप्त गरेको विश्वासको मत बदरको माग गर्दै पूर्वमुख्यमन्त्री हिक्मतकुमार कार्कीले रिट दायर गरेका थिए । सर्वोच्चले अग्राधिकारसहित पूर्ण सुनुवाइका लागि १५ भदौको मिति तोकेको थियो ।

थापाले विश्वासको मत लिने दिन उक्त सभाका पालैपालो अध्यक्षता गरेका दुई प्रदेशसभा सदस्यले समेत थापाको पक्षमा मत दिएको भन्दै ती मत बदर हुनुपर्ने मागसहित कार्की सर्वोच्च पुगेका हुन् । सोही रिटमाथि शुक्रबार सुनुवाइ हुन लागेको हो ।