काठमाडौं । अख्तियार दुरुपयोग अनुसन्धान आयोगले त्रिभुवन विश्वविद्यालय सेवा आयोगका तत्काली प्रमुख परशुराम कोइरालासहित ६ जनाविरुद्ध भ्रष्टाचार मुद्दा दायर गरेको छ ।

उत्तरपुस्तिका परीक्षणमा अनियमितता गरेको आरोपमा उनीहरूविरुद्ध भ्रष्टाचारको मुद्दा दायर गरेको हो ।

जसमा उत्तरपुस्तिका रुजु गर्ने सेवा आयोगका तत्कालीन प्रमुख कोइरालासहित लेखा सहायक पदको प्रथम पत्र परीक्षण गर्ने सहप्राध्यापक केशव घिमिरे, दोस्रो पत्र परीक्षण गर्ने सहप्राध्यापक राजेश्वर न्यौपाने, पुस्तकालय सहायक पदको दोस्रो पत्र परीक्षण गर्ने पुस्तकालय सहप्रशासक इन्दिरा घिमिरे, उत्तरपुस्तिका संपरीक्षण गर्ने प्राडा टेकनाथ ढकाल र मुख्य कार्यालय सहायक बच्चुराम पाण्डेविरुद्ध भ्रष्टाचार मुद्दा दायर गरेको अख्तियारले जनाएको छ ।

०७४ सालमा भएको लेखा सहायक र पुस्तकालय सहायकको पदको लिखित परीक्षामा अनियमितता गरेको आरोप ६ जनामाथि लागेको हो ।

उनीहरू गलत मनसाय राखेर परीक्षार्थीको उत्तरपुस्तिका केरमेट गरेको, प्राप्ताङ्कमा हेरफेर गरी मेरिट सूची फेरबदल गरेकोजस्ता आरोपसहित अख्तियारले विशेष अदालतमा दायर गरेको हो ।