काठमाडौं । न्याय सेवा आयोगले २९ जना जिल्ला न्यायाधीशका लागि लिएको लिखित परीक्षामा एक जना मात्र उत्तिर्ण भएका छन् ।

आयोगले यहि साउन १६ गतेदेखि २० गतेसम्म २९ जना जिल्ला न्यायाधीशका लागि लिएको परीक्षामा २ सय ११ जना सहभागी भएका थिए ।

तर आयोगको आइतबार बसेको बैठकले परीक्षामा सहभागी भएका २ सय ११ जनामध्ये अन्तर्वार्ताका लागि १ जनाको नाम मात्रै सिफारिस गरेको छ ।

आयोगले आन्तरिक खुला र खुला समूहबाट पारसमणी पोखरेलको नाम अन्तर्वाताका लागि छनौट गरेको हो ।

आयोगले आन्तरिक खुलातर्फ १५, खुलातर्फ ७, महिलातर्फ २, आदिवासी-जनजातीतर्फ २, मधेसीतर्फ २ र दलित कोटामा १ जनागरि २९ जना जिल्ला न्यायाधीशका लागि लिखित परिक्षा लिएको थियो ।

पोखरेलको अन्तर्वार्ता असोज १ गते न्याय परिषद सचिवालय बिहान साढे १० बजे तोकिएको छ ।