काठमाडौं । संसदमा दर्ता भएको विद्यालय शिक्षा विधेयक विरुद्ध शिक्षकहरुले थालेको आन्दोलन दोस्रो दिन आज पनि जारी छ ।

उनीहरुले बिहीबार दोस्रो दिन पनि माइतीघरबाट नयाँबानेश्वरसम्म आएर फेरि माइतीघर फर्किने र कोणसभा गर्न गइरहेका छन् ।

शिक्षकहरुको आन्दोलनका कारण आज पनि ट्राफिक व्यवस्थापन अस्तव्यस्त बनेको छ । माइतीघर मण्डलादेखि नयाँ बानेश्वरसम्म चल्ने सडकमा सवारीसाधन नचल्दा सर्वसाधारणहरू सास्ती भोग्न बाध्य भएका छन् ।

विधेयक विरुद्ध शिक्षकहरुको आन्दोलनका कारण बुधबार हिजो पनि सवारीसाधन सञ्चालन अस्तव्यस्त बनेको थियो ।

शिक्षक महासंघका अनुसार देशभरबाट एक लाख भन्दा बढी शिक्षकहरू आन्दोलनमा सहभागी भएका छन् ।

उनिहरुले आज मात्रै उपप्रधान एवम् गृहमन्त्री नारायणकाजी श्रेष्ठ र शिक्षामन्त्री अशोक कुमार राईसँग वार्ता पनि गरेका थिए । छलफल सकारात्मक भएको दावी पनि गरिएको छ ।

उनीहरुबीच शिक्षकहरुको आन्दोलनलाई मर्यादित बनाउने र छिट्टै औपचारिक वार्तामा बस्ने सहमति भएको बताइएको छ ।

छलफलमा गृहमन्त्री श्रेष्ठले सरकारले शिक्षक भएर र शिक्षकले सरकार भएर सोचेर निष्कर्षमा पुग्नुपर्छ र समस्याको समाधान निकाल्नुपर्ने बताएका थिए ।

श्रेष्ठले आन्दोलनलाई शान्तिपूर्ण र व्यवस्थित बनाउन आग्रहसमेत गरेका थिए ।