धनगढी । मिस पवीको नामले चर्चित कलाकार तथा मोडल पवी साँकीलाईं फुटबल क्लब धनगढी एफसीले आफ्नो ब्रान्ड एम्बास्डरमा नियुक्त गरेको छ ।

शुक्रबार एक कार्यक्रमबीच धनगढी एफसीका सिईयो सकुश केसी र कलाकार मिस पवीले ब्रान्ड एम्बास्डरका लागि सम्झौता पत्रमा हस्ताक्षर गरे ।

धनगढी एफसीको ब्रान्ड एम्बास्डर नियुक्त भएपछि उनले भनिन् ‘नेपाल सुपर लिगको साबिक उपविजेता टोली धनगढी एफसीको ब्रान्ड एम्बास्डरका रुपमा जोडिन पाउँदा म एकदमै उत्साहित छु ।’

सम्झौता अनुसार यस सिजनको नेपाल सुपर लिग (एनएसएल) को दोस्रो संस्करणमा हुने खेलमा एम्बास्डर मिस पवीले स्टेडियममा बसेर धनगढी एफसीलाई हौसला समेत दिनेछिन् ।

नेपाल सुपर लिगको दोस्रो संस्करण आगामी मङ्सिर ८ देखि पौष २१ गतेसम्म काठमाडौँको दशरथ रङ्गशालामा हुँदै छ ।