काठमाडौं । काठमाडौं उपत्यका खानेपानी लिमिटेड (केयुकेएल) को प्रमुख कार्यकारी अधिकृत (सिइओ) को छनोट प्रक्रिया अघि बढेको छ ।

केयुकेएल प्रमुख कार्यकारी अधिकृत छनोट सिफारिस समितिले खुला प्रतिस्पर्धाबाट सिइओ छनोट गर्न गत असोज २३ गते आवेदन आह्वान गरेको थियो । आवेदन दिनेमध्येबाट ८ जनालाई सर्ट लिस्टिङमा राखेको छनोट समितिले कार्यपत्र प्रस्तुतीकरण र अन्तर्वार्ताको तयारी गरेको हो ।

प्रमुख कार्यकारी अधिकृत छनोट सिफारिस समितिले यही पुस १४ गते शनिबार तीन सत्रमा सर्ट लिस्टिङमा परेका उम्मेदवारहरूको कार्यपत्र प्रस्तुतीकरण राखिएको जनाएको छ । समितिका अनुसार, अन्तर्वार्ता कार्यक्रम कार्यपत्र प्रस्ततीकरणको दिन जानकारी गराइनेछ ।

केयुकेएलका तत्कालीन सिइओ मिलन शाक्य पदमुक्त भएपछि रिक्त रहेको पदमा पदपूर्तिका लागि गत असोज २३ गते आवेदन आह्वान गरिएको थियो । जसमा आवेदन दिनेमध्ये  इन्जिनियर श्री अर्जुनबाबु कार्की, उमेशबाबु मरहट्टा, डोलप्रसाद चापागाई, दीपेन्द्र कुमार देव र रमेश केसी सर्ट लिस्टिङमा परेका छन् । त्यसैगरी, अशोककुमार पौडेल, प्रकाशकुमार राई र राजेन्द्र श्रेष्ठले पनि सिईओको सर्ट लिस्टिङमा छन् ।

समितिले कार्यपत्र प्रस्तुतीकरण र अन्तर्वार्ता गरेर यिनैमध्ये एकलाई केयुकेएलको रिक्त सिइओमा नियुक्त गर्न सिफारिस गर्नेछ ।