काठमाडौं। विराटनगरमा हत्या गरेर फालिएको अवस्थामा किशोरीको शव फेला परेको छ।

विराटनगर महानगरपालिका–४ स्थित एउटा घरमा २३ वर्षीया चन्द्रिकाकुमारी दासको शव विभत्स अवस्थामा भेटिएको मोरङ प्रहरीले जनाएको छ। डेरा बसेको घरको कोठामा हत्या गरेर शौचालयमा शव फालिएको अवस्थामा शव भेटिएको प्रहरीले जनाएको छ।

प्रहरीका अनुसार उनी नोबेल शिक्षण अस्पतालमा कार्यरत स्टाफ नर्स हुन् । सिराहाको फुल्काहकट्टी घर भएकी दास अस्पताल नजिक विराटनगर– ४ बुढाथोकी मार्गस्थित धीरेन्द्र गिरीको घरमा डेरा बस्थिइन् ।

दासको घाँटी, अनुहारलगायत शरीरका विभिन्न भागमा गहिरो चोट देखिएको प्रहरीले बताएको छ । उनीमाथि धारिलो हतियार प्रहार गरी हत्या गरिएको देखिएको छ।