NepalWatch

News Portal For Eeverything In Nepal from Nepal

२०८२ असार २५ गते

बाँकेका गाइभैँसीलाई खोरेतविरुद्धको खोप

नेपालगञ्ज । बाँकेमा गाईभैँसीलाई खोरेतविरुद्धको खोप लगाइएको छ । एक लाख पाँच हजार एक सय पाँच गाईभैँसीलाई उक्त खोप लगाइएको हो ।

सरकारले उपलब्ध गराएको अनुदानका आधारमा जिल्लाका आठ स्थानीय तहका गाईभैँसीलाई खोरेतविरुद्धको खोप लगाइएको भेटेरिनरी तथा पशु सेवा विज्ञ केन्द्र, बाँकेका प्रमुख तथा वरिष्ठ मत्स्य विकास अधिकृत कमला अधिकारीले जानकारी दिइन् । खोप लगाउने कार्यक्रम अन्तिम चरणमा पुगेको उनले बताइन् ।

“अधिकांश स्थानीय तहमा खोप लगाइसकिएको छ । अबको एक सातामा खोप लगाइसक्छौँ”, उनले भनिन्, “यो खोप बाख्रा र बङ्गुरलाई पनि लगाउँछौँ । हाललाई (खुरफट्टा) गाई र भैँसीलाई प्राथमिकता दिएर खोप लगाउँदै छौँ ।” जिल्लामा अहिलेसम्म खोरेतको समस्या नदेखिएको र समस्या नआओस् भनेर सो खोप लगाइएको वरिष्ठ मत्स्य विकास अधिकृत अधिकारीले उल्लेख गरिन्। प्रत्येक वर्ष खोप अनिवार्यरुपमा लगाउनुपर्ने उनको भनाइ छ । खोरेतविरुद्ध पशु चौपायालाई बुस्टर डोज पनि लगाउन आवश्यक भएको उनले बताइन् ।

भेटेरिनरी तथा पशु सेवा विज्ञ केन्द्र, बाँकेका  अनुसार जानकी गाउँपालिकामा १५ हजार डोज, खजुरा गाउँपालिकामा १५ हजार एक सय ५०, बैजनाथ गाउँपालिकामा १० हजार, कोहलपुर नगरपालिकामा पाँच हजार, राप्तीसोनारीमा १० हजार, डुडुवा गाउँपालिकामा १५ हजार, नेपालगञ्ज उपमहानगरपालिकामा २० हजार तथा नरैनापुर नगरपालिकामा १५ हजार डोज खोप लगाइएको छ ।

गाई र भैँसीमा खोरेत रोगबाट क्षति हुनबाट बचाउन बर्सेनि उक्त खोप लगाइँदै आएको विज्ञ केन्द्रका प्रमुख अधिकारीले बताइन् । खोप लगाउन ७० कर्मचारी परिचालन गरिएको छ । बाँकेमा गत वर्ष बुस्टर डोजसहित एक लाख ४७ हजार डोज खोप लगाइएको थियो । सबैभन्दा बढी पशुपालन हुने क्षेत्र डुडुवा, नरैनापुर जानकी र खजुरा गाउँपालिका रहेका छन् ।