काठमाडौं । केही दिनअघि ट्राफिक नियम उल्लंघन गर्नेहरूलाई स्वयंसेवकको रूपमा सडकमा खटाएको विषय सामाजिक सञ्जालमा भाइरल भयो । धेरैले उपप्रधान तथा गृहमन्त्री रवि लामिछानेको यो कदमलाई सकारात्मक मानेका थिए । तर अब नियम उल्लंघन गर्नेहरूलाई त्यसरी सडकमा खटाउन नपाइने भएको छ ।

सर्वोच्च अदालतले यसरी ट्राफिक नियम उल्लंघन गर्नेलाई सडकमा स्वयंसेवकको रुपमा नखटाउन अन्तरिम आदेश दिएको छ । आज न्यायाधीश तिलप्रसाद श्रेष्ठको एकल इजलासले यस्तो आदेश दिएको हो ।

उपप्रधान तथा गृहमन्त्री लामिछानेको यो आदेशविरुद्ध शुक्रबार सर्वोच्चमा रिट निवेदन परेको थियो । ट्राफिक नियम उल्लंघन गरेवापत जरिवानामात्रै तिराउन सक्ने कानुनमा उल्लेख भएपनि प्रहरीले शारीरिक दण्ड दिएको रिटमा जनाइएको थियो ।

मन्त्री लामिछानेले महिला ट्राफिक प्रहरीहरुले महिनावारीका ४ दिन सडकमा ड्युटी गर्नुनपर्ने र उनीहरूको साटो नियम उल्लंघन गर्नेहरूलाई सडकमा खटाउने निर्णय गरेका थिए ।