काठमाडौं । त्रिभुवन विश्वविद्यालयले एक उप–प्राध्यापकलाई स्पष्टीकरण सोधेको छ । सुर्खेत बहुमुखी क्याम्पसका उप–प्राध्यापक लालबहादुर राना बिदा स्वीकृतबेगर लामो समय कार्यालयमा हाजिर नभएपछि त्रिवि कर्मचारी प्रशासन महाशाखाले ३५ दिने स्पष्टीकरण सोधेको हो ।

उप–प्राध्यापक रानाले ०७३ कात्तिक १८ गते ५ वर्षको अध्ययन स्वीकृत गराएकोमा त्यसको म्याद ०७८ कात्तिक १८ गते समाप्त भएको थियो । त्रिवि शिक्षक कर्मचारी सेवासम्बन्धी नियम, २०५० को नियम ३०(५) अनुसार बिदा सकिएपछि प्राध्यापन कार्यमा संलग्न हुनुपर्नेमा उनी सम्पर्कविहीन थिए ।

उप–प्राध्यापक राना आफू कार्यरत क्याम्पसमा बिनाजानकारी ९० दिनभन्दा बढी दिन अनुपस्थित भएकाले त्रिवि कार्यकारी परिषद्को गत जेठ ३० गतेको निर्णयानुसार ३५ दिने स्पष्टीकरण सोध्ने निर्णय गरिएको महाशाखाले जनाएको छ ।

उप–प्राध्यापक राना अध्ययन बिदामा बस्दा रकम लिएका श्रेष्ठले कबुलियतनामामा त्यसको ब्याज भुक्तानी गर्ने सर्तमा मञ्जुरी जनाएका छन् । महाशाखाले सापटी र त्यसको ब्याजसमेत असुल उपर गर्ने गरी कारबाही प्रक्रिया अघि बढाएको छ ।