काठमाडौं । लुम्बिनी प्रदेशका नवनियुक्त मुख्यमन्त्री चेतनारायण आचार्यले पद तथा गोपनीयताको शपथ लिएका छन् ।

बुधबार बिहान प्रदेश प्रमुखको कार्यालय, बुटवलमा आयोजित एक समारोहबीच मुख्यमन्त्री आचार्यले प्रदेश प्रमुखबाट पद तथा गोपनीयताको शपथ लिएका हुन् ।

एमाले–कांग्रेस गठबन्धनसँगै माओवादी केन्द्रबाट मुख्यमन्त्री बनेका जोखबहादुर बोहोरा हटेपछि आचार्य एमालेतर्फबाट मुख्यमन्त्री बनेका हुन् ।

लुम्बिनी प्रदेशको मुख्यमन्त्रीमा एमालेको सो प्रदेशका संसदीय दलका नेता लिला गिरीले आकांक्षा देखाएका थिए । तर उनलाई रोकेर आचार्यलाई मुख्यमन्त्री बनाइएपछि एमालेमा असन्तुष्टि देखिएको छ । एमाले महासचिव शंकर पोखरेलको चाहनामा गिरीलाई रोकेर दलका उपनेता गिरीलाई मुख्यमन्त्री बनाइएको एमालेभित्र चर्चा छ ।

लुम्बिनी प्रदेशमा एमालेभित्र देखिएको असन्तुष्टि शपथ ग्रहण समारोहमा पनि देखियो । मुख्यमन्त्री आचार्यको शपथ ग्रहणमा गिरीलाई निम्तो गरिएकोमा उनी अनुपस्थित रहे ।