काठमाडौं । कीर्तिपुर नगरपालिकाका नगर प्रमुख (मेयर) राजकुमार नकर्मीको निधन भएको छ । उनको उपचारका क्रममा बिहीबार राति निधन भएको हो ।

कीर्तिपुर नगरपालिकाका सूचना अधिकारी प्रकेशचन्द्र लाल श्रेष्ठले मेयर नकर्मीको बिहीबार राति वीर अस्पतालमा उपचारका क्रममा निधन भएको नेपालवाचलाई जानकारी दिए ।

दिवंगत नकर्मी मिर्गौला रोगबाट पीडित थिए । दुवै मिर्गौला फेल भएपछि उनी केही समययता डायलासिस गराउँदै आइरहेकोमा स्वास्थ्यमा जटिलता आएपछि अस्पताल भर्ना भएका थिए ।

नकर्मीको आजै अन्तिम दाहसंस्कार गर्ने तयारी  छ ।

गत स्थानीय तह निर्वाचनमा नेपाली कांग्रेसको तर्फबाट उम्मेदवार बनी विजय हासिल गरेका नकर्मीका एक छोरा, एक छोरी र श्रीमती छन् ।

यसैबीच, कीर्तिपुर नगरपालिकाले मेयर नकर्मीको निधनमा आज शोक बिदा दिएको छ ।