काठमाडौं । सिराहामा आफ्नै छोराबुहारीको कुटपिटबाट बाबुको ज्यान गएको छ । जिल्लाको औरही गाउँपालिका–३, खजनपुर टोलका ६५ वर्षीय भालेश्वर यादवको छोरा शैलेन्द्रकुमार र बुहारी रेणुकुमारीको कुटपिटबाट ज्यान गएको हो ।

जिल्ला प्रहरी कार्यालय, सिराहाका अनुसार, घरायसी विवादमा छोराबुहारीले सोमबार बावुमाथि कुटपिट गर्दा उनी गम्भीर घाइते भएका थिए । प्रादेशिक अस्पताल सिराहामा प्राथमिक उपचारपछि नोबेल अस्पताल, विराटनगरतर्फ लगिएकोमा उनको बाटैमा मृत्यु भएको हो ।

घटनालगत्तै प्रहरीले शैलेन्द्रलाई नियन्त्रणमा लिएर आवश्यक अनुसन्धान प्रक्रिया अघि बढाएको छ ।

मृतक भालेश्वरको शव पोस्टमार्टमपछि अर्का छोरा रामप्रतापको जिम्मा लगाइएको प्रहरीले जनाएको छ ।