काठमाडौं । बागमती प्रदेशको स्वास्थ्य मन्त्रालयले लामो समयदेखि बिना जानकारी गैरहाजिर रहेका दुई कर्मचारीलाई सेवाबाट हटाउने प्रक्रिया अघि बढाएको छ । लामो समयदेखि गैरहाजिर कर्मचारीलाई स्पष्टीकरण सोध्दै मन्त्रालयले कारबाही प्रक्रिया थालेको हो ।

स्पष्टीकरणतथा सफाइ पेश गर्ने मौका दिइएकामा आठौं तहका आयुर्वेद चिकित्सक सुइरा जोशी र पाँचौं तहकी ल्याब टेक्निसियन सरिता पौडेल छन् ।

बागमती प्रदेश सरकार स्वास्थ्य मन्त्रालयका अनुसार आयुर्वेद तथा वैकल्पिक चिकित्सालय, रसुवामा कार्यरत जोशी ०७९ चैत १९ देखि र मेथिनकोट अस्पताल काभ्रेपलाञ्चोकमा कार्यरत पौडेल ०७९ चैत ३ देखि हालसम्म बिना जानकारी गैरहाजिर छन् ।

नेपाल स्वास्थ्य सेवा नियमावली, २०५५ अनुसार बिदा स्वीकृत नगरी बिदामा बसेकाले जोशी र पौडेलसँग १५ दिने स्पष्टीकरण मागिएको मन्त्रालयले जनाएको छ ।