मान्म । जिल्लाको दुर्गम गाउँमा खाद्य बिक्री केन्द्र स्थापना भएको छ । खाद्य व्यवस्था तथा व्यापार कम्पनी लिमिटेडले शुभकालिका गाउँपालिका–२, भर्ता नैनेलडाँडामा बिक्री केन्द्र स्थापना गरेको हो ।

गाउँमा खाद्यान्न बिक्री केन्द्र स्थापना भएपछि यहाँका स्थानीयलाई चामल किन्न घन्टौं हिँडेर बजार पुग्नुपर्ने बाध्यता हटेको छ ।

“गाउँका नागरिकले यसअघि चामल लिनका लागि सदरमुकाम मान्म जानुपर्ने बाध्यता रहेको थियो,” शुभकालिका गाउँपालिका–२ का वडाध्यक्ष मनबहादुर शाहीले भने, “सदरमुकाममा खाद्यान्न लिनका लागि खाद्यान्नको भन्दा महँगो गाडी भाडा तिर्नुपर्ने अवस्था थियो । ”

गाउँपालिकाको पहलमा केन्द्र स्थापना भएसँगै स्थानीयले सहज रूपमा अनुदानको चामल पाउने विश्वास वडाध्यक्ष शाहीले व्यक्त गरे ।

स्थानीय तहसँग मिलेर नागरिकलाई गुणस्तरीय खाद्यान्न उपलब्ध गराउने लक्ष्य रहेको खाद्य व्यवस्था तथा व्यापार कम्पनी लिमिटेड कालीकोट शाखाले जनाएको छ ।