काठमाडौँ – समाज कल्याण परिषद्ले काठमाडौँको भृकुटीमण्डपस्थित विभिन्न संघसंस्थाका कार्यालयहरूमा तालाबन्दी गरेको छ। वर्षौँदेखि भाडा नतिर्दै आएका २० वटा संघसंस्थाका कार्यालय र पसलहरूमा सोमबार ताला लगाइएको हो।

परिषद्का अनुसार पटक–पटक सूचना जारी गर्दा पनि सम्बन्धित निकायहरूले भाडा नतिरेपछि बाध्य भएर यस्तो कदम चालिएको हो। तालाबन्दी गरिएका संस्थाहरूमा रिपोटर्स क्लब, काठमाडौं पुस्तकालय, फोटो पत्रकार महासंघ, अपाङ्ग महासंघलगायत रहेका छन्।

परिषद्का सदस्य सचिव सरोज कुमार शर्माले ती संस्थाहरूबाट १० करोड रुपैयाँभन्दा बढी भाडा बक्यौता उठ्न बाँकी रहेको जानकारी दिएका छन्। उनले बक्यौता रकम चाँडै तिर्न सम्बन्धित पक्षलाई आग्रह समेत गरेका छन्।