काठमाडौँ । नेपाल प्रहरीले सेवाग्राहीले आफ्ना गुनासो तथा उजुरीहरू अब अनलाइन माध्यमबाटै दर्ता गर्न सक्ने व्यवस्था सुरु गरेको छ ।

प्रहरी प्रधान कार्यालयले ‘नेपाल पुलिस एप’ सार्वजनिक गर्दै नागरिकलाई डिजिटल माध्यमबाट उजुरी दिने सुविधा उपलब्ध गराएको हो । सो एपमार्फत प्रहरीसँग सम्बन्धित गुनासा, उजुरी तथा सेवा सम्बन्धी समस्या अनलाइनमै दर्ता गर्न सकिने व्यवस्था गरिएको छ ।

प्रहरी प्रधान कार्यालय, नक्सालमा मंगलबार आयोजित कार्यक्रममा प्रहरी महानिरीक्षक दानबहादुर कार्कीले नागरिक सहायता तथा गुनासो व्यवस्थापनसम्बन्धी अनलाइन प्रणालीको औपचारिक शुभारम्भ गरे ।

नयाँ प्रणालीमार्फत दर्ता भएका उजुरीको कार्यान्वयन अवस्था अनलाइनमै हेर्न सकिने, आवश्यक परे थप विवरण वा प्रमाण माग गर्न सकिने तथा सम्बन्धित निकायसँग च्याटमार्फत प्रत्यक्ष संवाद गर्न सकिने व्यवस्था गरिएको प्रहरीले जनाएको छ ।