काठमाण्डौ । अमेरिकी राष्ट्रपति डोनाल्ड ट्रम्पले भारत र अमेरिकाबीचको व्यापार सम्झौता छिट्टै सम्पन्न हुने आशा व्यक्त गरेका छन्।

व्यापार सम्झौताबारे बोल्दै उनले भने, ‘हामी अन्ततः एउटा सम्झौतामा पुग्नेछौँ, किनकि मलाई प्रधानमन्त्री नरेन्द्र मोदी निकै मनपर्छ। उहाँ मेरा असल मित्र हुनुहुन्छ र हाम्रो आपसी सम्बन्ध निकै राम्रो छ। हाम्रो द्विपक्षीय सम्बन्ध अत्यन्त सुदृढ छ।’
यद्यपि, ट्रम्पले पुनः एकपटक भारतले अमेरिकामाथि अत्यधिक ट्यारिफ लगाएको र त्यसको बदलामा अमेरिकाले कुनै उल्लेखनीय लाभ प्राप्त नगरेको दाबी दोहोर्‍याए।

ह्वाइट हाउसमा पत्रकारहरूसँग कुराकानी गर्दै उनले भने, ‘वर्षौँसम्म भारतले अमेरिकाको फाइदा उठायो। भारतले अमेरिकी वस्तुहरूमाथि अत्यन्त उच्च ट्यारिफ लगायो, तर त्यसको बदलामा अमेरिकाले केही पाएन। अहिले अवस्था पूर्ण रूपमा बदलिएको छ। अब हामी भारतसँगको व्यापारबाट उल्लेखनीय आम्दानी गरिरहेका छौँ।’