काठमाडौँ । मोबाइल चोरेको आरोपमा बालबालिकालाई रुखमा बाँधेर कुटपिट गरेको आरोपमा बाराबाट चार जना पक्राउ परेका छन् ।

जिल्ला प्रहरी कार्यालय बाराका अनुसार यही असार १६ गते जितपुर सिमरा उपमहानगरपालिका–१६ टांगिया बस्तीस्थित सार्वजनिक चौतारामा ४ जना बालबालिकालाई मोबाइल चोरी गरेको भन्दै बरको रुखको फेदमा डोरीले बाँधी कुटपिट गरिएको थियो । कुटपिट गर्ने चार जनालाई बुधबार प्रहरीले पक्राउ गरेको हो ।

पक्राउ पर्नेमा बाराको जितपुर सिमरा उपमहानगरपालिका–१६ टांगिया बस्ती बस्ने अन्दाजी वर्ष ६२ की मिना रजन मगर, वर्ष ३२ की पवि कुमारी आले मगर, वर्ष ३० की रानीमाया मोक्तान र वर्ष ४२ की निर्मला वाईवा रहेका छन् ।

उनीहरूविरुद्ध बालबालिका विरुद्धको कसूरमा मुद्दा दर्ता गरी बारा जिल्ला अदालत कलैयाबाट पाँच दिनको म्याद थप गरी अनुसन्धान कार्य भइरहेको प्रहरीले जनाएको छ।