लमजुङका प्रमुख जिल्ला अधिकारी कृष्णप्रसाद खनालका अनुसार आज साँझ करिब ७ बजेदेखि नेपाल प्रहरी र सशस्त्र प्रहरी परिचालन गरी नदी किनारका बस्तीहरूमा माइकिङ सुरु गरिएको छ। प्रशासनले विशेष गरी खुदी, भकुन्डे र पाउदी क्षेत्रका बासिन्दालाई घर छाडेर उच्च स्थानमा जान निर्देशन दिएको हो।

मनाङको चामे गाउँपालिका-४ स्थित घट्टेखोलामा पहिरो खस्ने क्रम नरोकिएको खनालले बताए। पहिरोले खोला थुनिएर बाँध फुट्दा तल्लो तटीय क्षेत्रमा ठूलो विनाश निम्त्याउन सक्ने जोखिम छ। खनालले भने, ‘अहिले नदीको पानीको बहाव केही कम देखिए पनि माथिल्लो क्षेत्रको घट्टेखोलामा पहिरो झर्ने क्रम रोकिएको छैन। कुनै पनि बेला खोला थुनिन सक्छ र त्यो फुटेर आउँदा नदी आसपासका बस्ती सखाप पार्ने खतरा छ। पाउदीलगायत स्थानमा यसअघि नै बाढीको प्रभाव देखिइसकेकाले समयमै सतर्कता अपनाएका हौं।’

बाढीको गम्भीर जोखिमलाई मध्यनजर गर्दै लमजुङमा रहेका दुई ठूला जलविद्युत् आयोजनाको विद्युत् उत्पादन बन्द गराइएको छ। प्रशासनको आग्रहपछि ७० मेगावाटको मध्य मर्स्याङ्दी र ५० मेगावाटको माथिल्लो मर्स्याङ्दी जलविद्युत् आयोजनाका बाँधका सबै ढोका खोलेर पानीको निकास खुला गरिएको छ। साथै मर्स्याङ्दी करिडोरमा निर्माणाधीन आयोजनाका प्राविधिक तथा मजदुरहरूलाई समेत सुरक्षित स्थानमा जान निर्देशन दिइएको छ। प्रशासनले नदी किनारमा अनावश्यक आवतजावत नगर्न सर्वसाधारणलाई सूचित गरेको छ।