काठमाडौं। तेस्रो संस्करणको नेपाल प्रिमियर लिग (एनपीएल) को उद्घाटन दिनका लागि बिक्री खुला गरिएको सम्पूर्ण टिकट आधा घण्टामै ‘सोल्ड आउट’ भएको छ।

नेपाल क्रिकेट संघ (क्यान) ले गएराति ८ बजेदेखि अनलाइनमार्फत टिकट बिक्री खुला गरेको थियो। बिक्री खुला भएको ३० मिनेटभित्रै पहिलो दिनको सबै टिकट बिक्री भइसकेको क्यानले जनाएको छ।

कात्तिक ९ गतेदेखि कीर्तिपुरस्थित त्रिभुवन विश्वविद्यालय अन्तर्राष्ट्रिय क्रिकेट मैदानमा आयोजना हुने प्रतियोगिताका लागि क्यानले विभिन्न चरणका खेलअनुसार टिकटको दर तोकेको छ।

क्यानका अनुसार लिग चरणका खेलका लागि साधारणतर्फको टिकट मूल्य ५०० रुपैयाँ र प्रिमियमतर्फको टिकट मूल्य १,००० रुपैयाँ तोकिएको छ। यस्तै, नकआउट चरणअन्तर्गतका एलिमिनेटर, क्वालिफायर तथा फाइनल खेलका लागि साधारणतर्फ १,००० रुपैयाँ र प्रिमियमतर्फ २,००० रुपैयाँ मूल्य निर्धारण गरिएको छ।

प्रतियोगिताको उद्घाटन खेलमा साविक विजेता लुम्बिनी लायन्स र सुदूरपश्चिम रोयल्सबीच प्रतिस्पर्धा हुने कार्यक्रम रहेको छ।