यो सेवा सुरु भएसँगै अन्तर्राष्ट्रिय उडानमार्फत नेपाल आउने यात्रुहरूले आफ्नो सामान विमानबाट झारिएपछि ब्यागेज बेल्टसम्म आइपुग्ने प्रक्रियाबारे प्रत्यक्ष जानकारी प्राप्त गर्न सक्नेछन्। यसले यात्रुलाई आफ्नो सामानको अवस्थाबारे जानकारी लिन सहज बनाउनुका साथै ब्यागेज प्राप्त गर्न लाग्ने समयको अनुमान गर्नसमेत सहयोग पुर्‍याउने अपेक्षा गरिएको छ।

नयाँ व्यवस्थाले ‘ब्यागेज ड्रप’ क्षेत्रमा भइरहेको गतिविधि आगमन कक्षबाटै देख्न सकिने भएकाले यात्रुको प्रतीक्षा समयलाई थप सहज र व्यवस्थित बनाउने विश्वास मन्त्रालयले लिएको छ। यात्रु सेवाको गुणस्तर अभिवृद्धि, सेवा प्रवाहमा पारदर्शिता र आधुनिक प्रविधिको प्रयोगमार्फत विमानस्थललाई अन्तर्राष्ट्रिय मापदण्डअनुरूप विकास गर्ने प्रयासस्वरूप यो सेवा सुरु गरिएको मन्त्रालयले जनाएको छ।