प्रधानमन्त्री शाहले सामाजिक सञ्जालमार्फत दिएको सन्देशमा नेपाल संवत् चन्द्रमामा आधारित नेपालको मौलिक समयचक्र र पहिचान भएको उल्लेख गरेका छन्। उनले शङ्खधर साख्वाःले देशभरका जनतालाई ऋणमुक्त पारेर यो संवत् सुरु गरेको स्मरण गरेका हुन्।

म्ह पूजाको सन्दर्भमा प्रधानमन्त्री शाहले भने, ‘म्ह अर्थात् आफ्नै देह र शरीरभित्रको चेतनालाई साक्षी राखेर, अष्टचिरञ्जीवीको प्रतीक मण्डपमा आफैँले आफैँलाई पूजा गर्ने यस परम्पराले आत्मशुद्धि र चेतनाको बोध गराउँछ।’ उनले यो मौलिक परम्पराले नेवार समुदायमा आपसी सद्भाव, आत्मबल र पुर्ख्यौली संस्कृतिको जगेर्ना गर्दै जातीय एकतालाई अझ प्रगाढ बनाउने गरेको बताएका छन्।

प्रधानमन्त्री शाहले चाडपर्वले रिसराग भुलेर सामाजिक एकता र सहिष्णुताको भावनालाई बलियो बनाउन प्रेरित गरोस् भन्ने कामना गरेका छन्। उनले सबैको जीवनमा सुख, शान्ति, समृद्धि र उत्तरोत्तर प्रगतिको कामनासहित शुभकामना दिएका छन्।