पहिलो खेलमा पोखराले दिएको १३३ रनको लक्ष्य विराटनगरले १९.२ ओभरमा ६ विकेट गुमाएर पूरा गर्यो। विराटनगरका लागि बसिर अहमदले ३७ र लोकेश बमले ३३ रन बनाए। विराटनगरका कप्तान सन्दीप लामिछानेले ४ ओभरमा २७ रन खर्चेर ६ विकेट लिए, जसमा ह्याट्रिक पनि समावेश थियो। पोखराका युवराज सम्राले ८४ रन बनाए पनि टोलीलाई जोगाउन सकेनन्। यस हारसँगै ६ खेलमा २ अंक मात्र जोडेको पोखरा लिग चरणबाटै बाहिरिएको छ।

दोस्रो खेलमा लुम्बिनी लायन्सले कर्णाली याक्सलाई ४ विकेटले पराजित गर्यो। पहिले ब्याटिङ गरेको कर्णाली १९.२ ओभरमा १०५ रनमा अलआउट भयो। जवाफमा लुम्बिनीले १६.४ ओभरमा ६ विकेट गुमाएर लक्ष्य भेट्टायो। लुम्बिनीका डार्सी सर्टले सर्वाधिक ४६ रन बनाए। यो जितपछि ६ खेलबाट ९ अंक जोडेको लुम्बिनी तालिकाको शीर्ष स्थानमा रहँदै प्लेअफमा पुगेको छ। लुम्बिनीका कन्सल्ट्यान्ट प्रशिक्षक शक्ति गौचनले टोलीको लक्ष्य पूरा भएकोमा खुसी व्यक्त गरे।

कर्णाली याक्स ६ खेलबाट ४ अंकसहित सातौँ स्थानमा छ। टोलीका अलराउन्डर गुल्शन झाले ब्याटिङमा सुधार आवश्यक रहेको बताए। अब कर्णालीले अन्तिम खेलमा चितवन राइनोजको सामना गर्नेछ भने विराटनगरले लिग चरणको अन्तिम खेलमा लुम्बिनीसँग खेल्नेछ।