काठमाडौं । नेपाली राष्ट्रिय क्रिकेट टोलीका कप्तान सन्दीप लामिछाने इन्डियन प्रिमियर लिग (आइपिएल) टि–ट्वान्टी क्रिकेटको मेगा अक्सनमा अनसोल्ड भएका छन् ।

भारतको बैंगलोरमा भएको आइपिएलको अक्सनमा सन्दीप अनसोल्ड भएका हुन् ।

अक्सनमा सन्दीपको न्युनतम मूल्य ४० लाख भारू रहेको थियो । तर, उनलाई कुनै टिमले पनि बोली लगाएनन् ।

सन्दीपले यसअघि तीन सिजन दिल्ली क्यापिटल्सबाट आइपिएल खेलिसकेका छन् । यद्यपि, गत वर्षदेखि उनी बिक्न छोडेका छन् । टि–ट्वान्टीमा ग्लोबल स्टारको छवि बनाएका सन्दीप पछिल्लो एक वर्षयता त्यही लयमा देखिएका छैनन् । यसले गर्दा पनि उनलाई आइपिएलका कुनै टोलीले नबिकेको विश्लेषण गरिएको छ ।

साथै, पछिल्लो समयमा लेग स्पिनमा भारतमै थुप्रो खेलाडी उदाएका छन् । यसले गर्दा पनि लेग स्पिनर सन्दीप आइपिएलमा नपरेको मान्न सकिन्छ ।

दिल्लीले सन्दीपलाई सन् २०१८ को अक्सनमा न्युनतम मूल्य २० भारूमा अनुबन्ध गरेको थियो । त्यससँगै सन्दीप आइपिएल खेल्ने पहिलो र एकमात्र नेपाली खेलाडी बनेका थिए ।

तीन सिजन आइपिएलमा बिताएका सन्दीपले कुल ९ खेलमा १३ विकेट लिएका थिए ।