डोटी । शिखर नगरपालिका–१ गेरुपानी सडक खण्डमा यात्रु बाहक दुर्घटना हुँदा  १८ महिने बालक बेपत्ता भएका छन् भने १२ जना घाइते भएका छन् । घाइतेमध्ये ५ जनको अवस्था गम्भीर रहेको  डोटी प्रहरीले जनाएकाे छ।

कैलालीबाट अछामका लागि छुटेको ना ५ ख ९६६३ नम्बरको रात्रि बस दुर्घटना भएको हो । प्रहरीका अनुसार शनिबार बिहान ५ बजेको समयमा बस दुर्घटना भएको हो ।

घाइतेहरुको दिपायलस्थित शैलेश्वरी अस्पतालमा उपचार भइरहेको इलाका प्रहरी कार्यालय दिपायलका प्रमुख रुपसिंह थापाले बताए । गम्भीर भएका घाइतेहरूलाई उपचारका लागि जिल्ला बाहिर पठाउने तयारी भएको उनले बताए ।

तीव्र गतिमा रहेको बस चालक निदाएपछि दुर्घटना भएको हुन सक्ने प्रहरीको प्रारम्भिक अनुमान छ । बस सडकबाट २० मिटर तल नदीको किनारमा खसेको छ । बस चालक भने फरार छन् ।