काठमाडौं । नेकपा माओवादी केन्द्रका अध्यक्ष पुष्पकमल दाहाल प्रचण्डले स्टेट पार्टनरसिप प्रोग्राम (एसपीपी) अमेरिकी सैन्य सम्झौता ओली सरकारको पालामा अगाडि बढेको आरोप लगाएका छन् ।

सहिद रितबहादुर खड्का स्मृति दिवसको अवसरमा बिहीबार केन्द्रीय कार्यलय पेरिसडाँडामा भएको कार्यक्रमलाई सम्बोधन गर्दै उनले राष्ट्रघात गर्नेहरू नै हावा राष्ट्रवादको प्रचार गरेको आरोप लगाए ।

‘जो आत्मसमर्पण गर्नेतिर जान्छन्, उनीहरूले नै हावा राष्ट्रवादको प्रचार गर्दैछन् । एसपीपी सम्झौता भइसक्यो रे भनेर जस्तो प्रचार गरिएको छ’, उनले भने, ‘वास्तवमा याे सम्झौता २०१९ ओली सरकारले अगाडि बढाएकाे हाे ।   गठबन्धनको नेताको हैसियतले कुनै हालतमा एसपीपी सम्झौता नहुने म प्रतिवद्धता जनाउन चाहन्छु ।’

उनले विगतको कमिकमजोरी सच्चाउँदै गठबन्धन अझै मजबुद बनाउँदै लैजाने बताए ।